कोल्हापूर : ‘लायन्स क्लब कोल्हापूर’च्या अध्यक्षपदी सुनील गायकवाड यांची, तर सचिवपदी जयश्री पाटील यांची नियुक्ती करण्यात आली. तसेच संजय कांबळे यांची खजिनदारपदी निवड झाली. त्यांच्याबरोबर इतर पदाधिकाऱ्यांनाही या वेळी शपथ देण्यात आली.
हा क्लब १९५६मध्ये स्थापन झाला असून, देशातील तिसरा व सर्वांत जुना क्लब आहे. ‘या क्लबने समाजासाठी अनेक कामे केली आहेत. अशा क्लबच्या शपथग्रहण समारंभास प्रमुख अतिथी म्हणून येण्याचा योग मला आला, हे माझे परमभाग्य आहे,’ असे मत वासुदेव कलघटगी यांनी व्यक्त केले. ते लायन्स क्लब कोल्हापूरच्या पदग्रहण व शपथविधी कार्यक्रमावेळी बोलत होते.
या वेळी कार्यक्रमाचे प्रास्ताविक प्राचार्य डॉ. एस. आर. पाटील यांनी केले. मनोहर शर्मा यांनी शपथ देऊन त्यांचा सन्मान केला. मावळते अध्यक्ष तानाजी चौगुले यांनी अध्यक्षीय, तर सुनील गायकवाड यांनी सेकेटरीपदाची धुरा सांभाळताना केलेल्या कार्याचा आढावा घेतला. जयश्री पाटील यांनी खजिनदार म्हणून केलेले कार्य, तसेच ट्रस्टची उभारणी याविषयी सांगितले.
मनोहर शर्मा, दीपक मोहोळकर, दादासाहेब पाटील, नार्वेकर, गुरुदेव पाटील, संध्या पाटील, तसेच क्लबचे सर्व सदस्य उपस्थित होते. आभार पोपटराव माळी यांनी व्यक्त केले.